JouMenseMyMense saam met SPAR – In die kake van omstandighede

Antoniete Louw het data gewen vir ‘n dag, waarmee sy vir ons ‘n epos gestuur het net om te sê hoe opgewonde sy is vir ons kuier! Sy het ‘n hele rukkie terug met ons kontak gemaak, maar, ons het gereeld ingeloer, met die hoop dat ons nog kan help. In haar laaste epos het sy gesê: ‘Nog geen verandering. Die nood is groot vir kos en prepaid krag.’
Haar aanvanklike epos aan ons het in die onderwerp die volgende woorde gehad: ‘Hulp en baie gebede’. Sy het nooit gevra vir geld nie. Hulle grootste behoefte tans is om haar man, Hennie, se kakebeen wat as gevolg van kakebeen-kanker verbrokkel, te herstel. Hulle het ‘n weldoener-dokter genader vir ‘n verwysingsbrief, om moontlik vinniger by die staatshospitaal reg te kom, maar, toe hulle navraag rig om te hoor vir ‘n operasie-datum, hoor hulle daar is 200 ander noodgevalle voor hulle op die waglys. Hennie is ook opsoek na ‘n meer permanente werk, en Antoniete enige werk. Sodat hulle nie net Hennie se kakebeen kan regmaak nie, maar ook hulle seun, Henrique weer kan terugsit in die skool. Hennie se inkomste dek tans die huur en water. Wanneer daar nie geld is vir brandstof nie, loop Pa Hennie 14 km werk toe.
Die eerste ding wat Hennie sê nadat hulle moeilik ontvang het, was die woord, ‘steak’. Mens kon sien hoe smul hulle aan die gedagte van iets wat ons baie maal vanselfsprekend en voordiehandliggend aanvaar. Ja, die ideaal is om vir iemand ‘n visstok te gee, maar soms het iemand ‘n vis nodig. Meer as ‘n vis. ‘n Drukkie. Woorde van waarheid en bemoediging en gebed. Ons is so jammer vir julle omstandighede…maar weet, gee nie om hoe groot ons omstandighede kan raak nie, Hy BLY groter! Mag hierdie vir julle ‘n keerpunt wees, in Jesus Naam.