Jou Mense My Mense saam met SPAR – Moedverloor se vlakte het ‘n adres

As jy ooit gewonder het waar presies moedverloor se vlakte lê, het ons vir jou die adres. Desire de Beer, haar vier kinders en haar Ma, Tannie Henda, en haar Pa is deur diep waters. Behalwe vir die dorre omstandighede waarin hulle hulself bevind, het hulle op 31 Julie vanjaar, hul broer en seun aan die dood verloor. Desire verdien tans R2 000 ‘n maand, waarmee sy haar vier kinders (waarvan twee jong dogters nog op skool is), haar Ma en haar Pa, probeer ondersteun. Ons het, saam met Lize Bothma van Lize Bothma Begrafnisdienste vir hulle gaan kuier.

Ons harte breek saam met julle, en is vandag dankbaar dat ons, saam met SPAR en Lize Bothma Begrafnisdienste ‘n verskil kon maak. Ons kon hulle skuld vir Jacques se verassing vereffen, en het, na ons gesprek, besluit om vir hulle ‘n verdere R3 000 te skenk – ter wille van ‘n HOOPstoot. Die eerste ding wat hulle gesê het was; ‘Vanaand kan ons lekker eet’. Lize Bothma het aangebied om vir Jacques en sy familie ‘n roudiens te reël. DANKIE, Lize!

Ek wil vir jou wat luister, vra om lewe te spreek oor hierdie gesin. Dat die hartseer wat saam met leuens gemanifesteer het, sal weggespoel word met Sy Lewende Water en Waarheid. Dat hulle opnuut sal bewusword van Sy ontferming oor hulle, en beloftes van ‘n lewe in oorvloed en voorspoed. Ja, wat vir my en jou, maar ook vir hierdie gesin beskore is.