#JouMenseMyMense saam met SPAR – 24 April 2018

Maria Bere is ‘n huishulp en ‘n enkelma wat hard werk om vir haar kinders ‘n beter toekoms te kan gee. Haar een dogter, Octovia, het ‘n beurs gekry en studeer hierdie jaar Skakelwese en kommunikasie deur UNISA. Op die 20ste Maart was Octovia ‘n slagoffer van ‘n gewapende roof toe sy met ‘n taxi gery het. Die man het ‘n mes by hom gehad waarmee hy die mense gedreig het. Hy het Octovia se laptop, selfoon en handboeke gesteel wat haar ma met hardverdiende geld vir haar gekoop het en nou is daar net eenvoudig nie geld om enige van hierdie items weer te kan vervang nie.
Een van die gesinne vir wie Maria werk, kon vir Octovia help met ‘n ou laptop, en Octovia het self ‘n duisend rand bymekaar gemaak waarmee sy so amper die helfte van haar studiemateriaal weer kon vervang. Toe ons hoor wat met haar gebeur het, was daar nog R1500 se handboeke wat sy weer moet aankoop en ook maar ‘n behoefte vir ‘n selfoon sodat sy as jong meisie in kontak kan bly met haar mense, kan kommunikeer en laat weet waar reis sy wanneer.
Danksy ons vriende van SPAR Northrand en spesifiek Monumentpark SuperSPAR, kan ons vandag vir ma Maria bederf met ‘n bietjie kruideniersware om net weer vir ‘n maand voor te kom na hulle boeke moes koop en toe weer vervang.
En vir Octovia – danksy anonieme borge, kan ons vandag R2000 gee om die laaste handboeke wat sy nodig het weer te koop EN vir ‘n selfoon!