Vermeende mensehandelaar bly in aanhouding

‘n Man wat na bewering 23 onwettige immigrante in ‘n Quantum vervoer het, het gister in die Low’s Creek periodieke hof verskyn op aanklagte van oortreding van die Wet op Mensehandel. Sibusiso Malwane is Saterdag op die R38 tussen Low's Creek en Kaapmuiden gearresteer. Sy passasiers, burgers van Bangladesh en Pakistan, word aangekla van oortreding van die Wet op Immigrasie. Hul saak is uitgestel tot Maandag. Die woordvoerder van die Valke in Mpumalanga, Kaptein Dineo Sekgotodi, sê Malwane kan Donderdag vir borgtog aansoek doen.