Lily Myn tragedie: Families kondig môre volgende stappe aan

Verteenwoordigers van ActionSA sowel as die familielede van die mynwerkers wie se liggame sedert die ineenstorting by Lily Myn in 2016 ondergronds vasgekeer is, sal môre die myn in Low’s Creek besoek om hul volgende beplande stappe aan te kondig. Dit volg na die Konstitusionele Hof verlede week finaal beslis het dat die myn se krediteure oor die sakereddingsplan moet stem. Die Nelspruit-landdroshof het ook na ‘n geregtelike doodsondersoek bevind Vantage Goldfields, die polisie en die Departement van Minerale Bronne en Energie het almal hul plig versuim. Die woordvoerder van ActionSA, Samkelo Mgobozi, sê die party bly daartoe verbind om te verseker die liggame van Yvonne Mnisi, Solomon Nyirende en Pretty Nkambule word na die oppervlak gebring.