DA bekommerd oor pasiënte se kos by Themba-hospitaal

Die DA in Mpumalanga sê hy is bekommerd oor beweringe dat pasiënte by Themba-hospitaal naby Witrivier nie van genoegsame kos voorsien word nie. Volgens Jane Sithole doen ‘n plasing die ronde op sosiale media oor hoe pasiënte soggens slegs twee snye droë brood ontvang voor ‘n maaltyd saans. Sy sê pasiënte en werknemers by die hospitaal voer ook aan dat hul etes deur verpleegkundiges gesteel word. Verder word daar beweer dat verskaffingskontrakte aan maatskappye toegeken word wat nie die kapasiteit het om die kos te voorsien nie. Sithole doen ‘n beroep op die LUR vir gesondheid, Sasekani Manzini, om dringend in te gryp en die kontrakte te oudit.