WANNEER HARE ‘MINCE’ ... EN KINDERS DROOM

Met: Riana Scheepers, Bianca Flanders
en Dale Blankenaar

Ure met die stryktang, saans met die
swirlkous, maar steeds mince jou hare
by die eerste teken van reën... Aktrise
Bianca Flanders het al as Lola, haar
alternatiewe verhoogpersoonlikheid,
mense laat skater met staaltjies oor
’n jong bruin vrou se verhouding met
haar hare. Sy vertel vir Riana Scheepers
hoekom sy Prinses Pampoenpit met
sy rebelse klein hoofkarakter juis ’n
prenteboek wou maak. Daarna vertel,
en hou die prenteboekillustreerder
Dale Blankenaar ’n video-vertoning oor
hoe prenteboeke letterlik “lewendig”
word op die eksotiese Nami-eiland. Dié
Koreaanse eiland word elke jaar tydens
Nami Councourse, die internasionale
prenteboek-illustreerderkompetisie,
in ’n kinderboek-fantasieparadys
omskep waar besoekers selfs tussen
3D-karakters uit die wenners se boeke
kan rondloop. Dale was een van 2019
se drie hoofwenners.