Subscribe to this channel

You can subscribe to new audio episodes published on this channel. You can follow updates using the channel's RSS feed, or via other audio platforms you may already be using.

RSS Feed

You can use any RSS feed reader to follow updates, even your browser. We recommend using an application dedicated to listening podcasts for the best experience. iOS users can look at Overcast or Castro. Pocket Casts is also very popular and has both iOS and Android versions. Add the above link to the application to follow this podcast channel.

Signup to iono.fm

Sign up for a free iono.fm user account to start building your playlist of podcast channels. You'll be able to build a personalised RSS feed you can follow or listen with our web player.
28
MAY

#JouMenseMyMense - 28 Mei 2019 - Hospitaalbesoek: Chardiney Ludick

Chardiney Ludick (4) het ongeveer 3 maande gelede aanvalle begin kry wat dokters aanvanklik gedink het is epileptiese aanvalle. Na verskeie toetse het hulle later bevestig dat dit deur ‘n breingewas veroorsaak word, wat vermoedelik oor die afgelope jaar gegroei het. Chardiney het begin met medikasie om te kyk wat die uitwerking op die gewas sal wees, maar toe sy laas Dinsdagoggend weer ‘n aanval by die kleuterskool kry, het dokters besluit om Saterdagoggend met ‘n noodoperasie die gewas te verwyder.

GROOTfm 90.5 het laas week uit verskillende oorde van Chardiney gehoor toe ‘n hele gemeenskap gehelp het om R55 000 binne 3 dae bymekaar te maak. Dit was die gedeelte wat die mediesefonds nie dek nie, maar betaal moes word voor Chardiney opgeneem kon word. As die dokter nie Saterdag kon opereer nie, sou hulle moes wag tot einde Julie. Die operasie het ongeveer 5 ure lank geduur en dokters kon 70% van die 4cm groot gewas suksesvol verwyder.

Ons het geweet Chardiney is nog in ICU en dat ons nie vanoggend by haar sal kan inloer nie, maar het met mamma Charné gereël dat ons net die “hoop-jy-voel-sommer-gou-gou-beter”-teddiebeer sal kom aflaai by die hospitaal. Toe dit tyd is vir die oorskakeling op lug, was die verpleegpersoneel besig om Chardiney’tjie se dreineringspyp uit te haal. Kort daarna het ‘n baie emosionele mamma Charné by ons aangesluit om haar dankbaarheid vir elke gebed, oproep, bydrae en boodskap te probeer verwoord. En toe die goeie nuus dat Chardiney’tjie na ‘n gewone saal oorgeplaas word en dat ons sommer self haar teddiebeer en gebedskussinkie vir haar kan gee! Toe die ICU deure oopswaai en ons die reuse pienk teddiebeer vir Chardiney in haar hospitaalbedjie aangee, was dit net hande wat swaai en die grootste glimlag oor hierdie nuwe en mooie maatjie!
24
MAY

Goeienuus Vrydag 24 Mei 15:30

Goeie Nuus Vrydag 24 Mei 2019 – ‘n Terugblik op ons besoek aan Wollies saam met die span van Cosmo Industrial en die Woeries van Hoërskool Centurion het gewoeker om ‘n hele berg baadjies in te samel.
21
MAY

#JouMenseMyMense saam met SPAR – die versorgers van Wollies – 21 Mei 2019

Wollies se oorspronklike doel toe Cilla Trexler in 2003 begin het, was om so veel as moontlik diere te steriliseer. Dit het egter nie daar gestop nie. Sy en haar span het meer en meer betrokke geraak om verwaarloosde en mishandelde diere te help en so het hulle spoedig ontwikkel tot ‘n volskaalse operasie en niewinsgewende organisasie wat vandag bekend staan as “Wollies Animal Shelter” – ‘n diereskuiling in Pretoria-Noord wat sonder enige regeringshulp ‘n veilige hawe vir amper 700 honde en katte bied tot elkeen van hulle ‘n permanente liefdevolle huis kry.

Wollies glo sterk dat mense opgevoed moet word oor die voordele van sterilisasie en as dit meer bekostigbaar was, sou daar minder verwaarloosde en mishandelde diere op straat gewees het.

Die diere wat hier is, was ongelukkig meestal aan geweldige wreedheid blootgestel, maar die versorgers wat hier dien met van drukkies tot lekker lang stapsessies sal nie opgee tot elke dier van die trauma herstel het nie. Hulle belofte aan hierdie diere is dat hulle nooit weer honger sal wees nie, nooit weer mishandel sal word nie en altyd ‘n warm bed en die liefde en aandag sal kry wat hulle verdien. Die kennels is ruim sodat ‘n paar honde saam kan bly en speel. Die voordeel natuurlik dat hulle sosiaal ontwikkel en makliker by ‘n gesin aanpas wat reeds ander honde het. Ook die katte het die mooiste huisies met blom beddens, maar ‘n liefdevolle omgee gesin sal steeds vir hulle die beste huis wees.

Hulle werk stop nie net by die skuiling nie. Hulle staan arm gemeenskappe by om hulle diere by die veearts uit te kry en te help met kos indien nodig. Hulle help tans 100 behoeftige gesinne om hulle troeteldiere te kan versorg. Hulle het al by 4 informele nedersettings in Pretoria-Noord gehelp met suksesvolle sterilisasieprogramme en in Oktober 2019 maak hulle weer so tydens die National Animal Week. Hulle gee selfs ‘n sak kos en ‘n kombers as hulle gehelp het om ‘n dier te steriliseer.
17
MAY

Goeienuus Vrydag 17 mei 10:30

Afrikaans Hoër Meisieskool en Hoërskool Waterkloof het kragte saamgespan vir GROOTfm 90.5 se #BlikkiesenBaadjies Winterprojek 2019! Bjorn Barnard, Onderhoofseun van Waterkloof in die portefeulje van lewensverryking saam met Waterkloof se onderhoofdogter, Suzaan de Villiers het verskillende skole genader om saam te werk aan die insameling vir GROOTfm se projek ten bate van Pen en Helpende Hand. Mila Grobler, Onderhoofdogter van Affies in die portefeulje liefdadigheid, saam met die onderhoofdogter vir gees, Caro Laubscher en hulle hoofdogter, Nika Grobler het op hulle beurt hulle Gee(s)week gebruik om nie net vir ons projek warm wintersklere en blikkieskos in te samel nie, maar ook vir 'n hele paar ander organisies van hondekos tot sanitêreware! Soos die span leiers van Affies vir ons sê: "Die beste manier om gees te bou in die aanloop na ons jaarlikse derby teen Oranje Meisies, is eintlik om soos een man (of vrou!) vir ander om te gee en aan te gee, wat ook al ons het om te deel!"
17
MAY

Goeie Nuus Vrydag - #JouMenseMyMense

‘n Goeie Nuus Vrydag terugblik op ons #JouMenseMyMense projek van 14 Mei 2019 ten bate van Juffrou Maretha Kruger van Hoërskool Centurion, moontlik gemaak deur ons borge We Buy Cars, Cosmo Industrial, King Price, Vision Properties en SPAR.
14
MAY

#JouMenseMyMense saam met SPAR - Juffrou Maretha Kruger

Toe die Woeries vanoggend 10 uur op die skool se aantreeblad bymekaar kom, het niemand geweet wat vir geliefde Juffrou Maretha Kruger (44) voorlê nie... Inteendeel, min mense het tot vandag geweet dat sy na ‘n lang dag op haar voete voor in die Duitse klas of op die sportveld waar sy Netbal, Sagtebal en Hokkie afrig, in die aand omtrent net kan lê met warmsakkies vir die pyn of dat sy op 5-jarige ouderdom al haar eerste kunsbeen gekry het en tot op hede dit elke 2 jaar moes vervang as gevolg van die slytasie op haar enkel. Jy sal dit nie sommer van haar weet nie, want in haar 22 jaar as onderwyseres het sy nog nooit toegelaat dat haar siekte haar op enige manier onderkry of terughou nie.

Die “kampstige” vergaderging waarvoor iemand haar laat kom het, het ons kans gegee om gou die leerders te vertel hoekom ons daar is en toe sy op die lang stoep voor die klaskamers aangestap kom, het die Woeries in ‘n baie emosionele oomblik soos een man vir haar opgestaan – amper asof hulle met ‘n gebaar erkenning wou gee aan hierdie juffrou wat haar lewe lank ten spyte van en te midde van haar moeilike omstandighede nog elke oggend opgestaan het om ‘n verskil te gaan maak.
07
MAY

#JouMenseMyMense 7 Mei 2019 - SPAR en COSMO Industrial versorg-die-versorgers

“My oom Loeks van Niewenhuizen en my tannie het hier by Huis Silversig gebly. My Tannie het 10 jaar voor dit ‘n beroerte gehad en sy kon nie praat nie. Toe my oom op sy einde was, het hulle my laat weet om te kom. Ek het hier by hom gesit en gesien hoe hulle hom versorg. Daai laaste 2, 3 ure voor hy oorlede is... hoe mooi hulle met hom gewerk het. Hulle het ‘n ander talent. Dit was vir my baie spesiaal...”

Hierdie woorde van Cosmo Industrial se CEO, Pierre van Niewenhuizen, verklap dalk die rede hoekom hy en sy span al in 2018 betrokke geraak het by Huis Silversig wat letterlik 700 meter van Cosmo se voordeur af is. Hier word 118 meestal verswakte ouer persone wat net ‘n SASSA pensioen kry, versorg. Ons het die afgelope 4 jaar deur verskillende projekte wat ons saam aangepak het, Cosmo se hart vir hulle plaaslike gemeenskap leer ken en laas jaar is die fondse van hulle Cosmo Run 2017 gebruik om by te dra vir een van die inwoners, Hennie (61) se elektriese rolstoel. “Ek het toe al besluit ons moet terugkom en iets vir die versorgers doen,” vertel Pierre.

Vandag was dit inderdaad die personeel se beurt en is die fondse van die Cosmo Run 2018 gebruik om elkeen van die 82 versorgers “te versorg” met ‘n splinternuwe baadjie en bootse vir die lang ure op hulle voete en die koue nagte se versorging wat voorlê hierdie winter – ‘n geskenk van meer as R30 000!

“Hierdie mense gee hulle alles. Hulle los hulle eie gesinne en klein kindertjies vroegoggend by die huis om ander se mense te kom versorg. Dis nie altyd maklik nie. Die take is uitmergelend. Hulle het hulle eie persoonlike uitdagings, dinge wat hulle moet oorkom, finansiële bekommernis, kindermoeilikheid - kinders wat hulle dalk verloor het aan die dood en dis hoekom vandag se gebaar en waardering vir wat hulle doen so besonders is,” sê Anneliese Bothma, Bestuurder van Huis Silversig.
05
MAY

Jesus Film Projek

Hullebediening is drievoudig: 1.) Mike is verantwoordelik vir al die Jesus Film Projek spanne in Suid Africa se film wys toerusting. 2.) Natasha is die koördineerder vir die Magdalena Vroue Film strategie in Suid Afrika en 3.) Hulle is die stigters van Eco Ministry waar ons uitreik onder staf met die Jesus Film Projek Strategie in die eko toerisme bedryf.
30
APR

#JouMenseMyMense saam met SPAR – 30 April 2019 – Huis Gracia se ma van vele

“Ek was ‘n nommer, ‘n bed en ‘n bord kos,” beskryf een dogter haar kinderhuis lewe voor sy by Huis Gracia, ‘n plek van veiligheid in die noorde van Pretoria kom bly het. Vir baie ander soos sy, was dit ‘n laaste uitweg en kans. Net 12 van die 82 kinders het enige kontak met enige familie, maar hier word vreemd-vir-mekaar kinders wat ook elkeen deur ‘n hofbevel met ‘n tas vol seer en verniel by die deur afgelaai is, soos boeties en sussies.

“Ons praat nooit weer oor wat agter is nie,” verduidelik huisma Trudie terwyl ons saam met haar en sus Lizet, Katie en die res van die span om die kombuistafel kuier. ‘n Groep van die kinders is ook by die huis, want die bus het nie opgedaag nie. Hulle gaan na die verste een van die 7 skole. Die res is meeste binne loopafstand van die verskillende hoër- en laerskole.

“Ons wil hê ons kinders moet sover moontlik aan alles by die skool deelneem, van sport en revue, spreekkoor en redenaars.” En hulle presteer! Hier is leiers, twee top 10 leerlinge en in 2018 het 40 van die kinders Gauteng-Noord ringbal gespeel behalwe nog die 14 wat op die ou end vir die Suid-Afrikaanse span gekies is!
26
APR

Goeie Nuus Vrydag – 26 April 2019 – Martie Venter

Martie se gesondheidstryd het 2 weke na haar geboorte begin toe sy ‘n bloedoortapping moes kry. Daar was komplikasies wat Atetose meegebring het en Martie se balans, gehoor en spraak aangetas het. Sy is op 19 jarige ouderdom - 29 jaar gelede - die eerste keer met kanker gediagnoseer: o.a. baarmoederkanker, borskanker, maagkanker tot waar sy die afgelope 4 jaar geen meer vaste kos kan eet nie. In 2018 het die kanker na haar kliere en die res van haar liggaam versprei en verloor sy die gebruik van haar dominante hand, maar sy bly die mees positiewe mens wat jy in jou lewe sal ontmoet.

Ons vriende van SPAR het gesorg vir ‘n R1000 geskenkaart, ‘n anonieme borg het gehelp met die koste van ‘n week lange limfdreineringbehandeling vir verligting van haar pyn en met ‘n vinnige oproep na ons vriende van Binnelanders kon ons een van haar groot drome help bewaarheid – ‘n besoek aan die stel van Binnelanders. Hoor bietjie wat het sy en haar vriendin Ria van hierdie belewenis gedink en dan die ekstra goeie nuus: Vision Properties wat R5000 skenk vir Martie se huur!
23
APR

#JouMenseMyMense – Martie Venter – 23 April 2019

Martie se German Sherperd, Flekkie keer eers beskermend by die voordeur van haar woonstel voor ons as’tware sy toestemming het om in te stap. Ons weet nie heeltemal wat om te verwag nie. Amper soos Ria toe Martie daardie eerste dag voor haar huis stop om na die woonstel te kom kyk. Sy kon nie mooi hoor wat Martie oor die foon probeer sê nie. As jy haar ontmoet sien jy eers net haar vriendelike gesig met oë wat lag voor jy besef haar lyf het seer. Sy het daardie dag kort na “aangename kennis” vir Ria en haar man verduidelik hoe siek sy is en hoe sy sukkel om blyplek vir haar en haar hond te kry. Dit was 6 maande gelede. Vandag voel ons saam met Martie en Flekkie tuis in hulle huisie in Villieria terwyl Ria vertel van hulle vriendskap wat vir haar ‘n daaglikse inspirasie geword het.

Martie se gesondheidstryd het 2 weke na haar geboorte begin toe sy ‘n bloedoortapping moes kry as gevolg van geelssug. Daar was komplikasies wat Atetose meegebring het. Martie se balans, gehoor en spraak is aangetas. Sy is deur skoolmaats en selfs familie gespot en na haar ouers 3 weke uitmekaar aan kanker oorlede is, moes sy die lewe se uitdagings alleen trotseer.

Sy is 29 jaar gelede die eerste keer op 19 jarige ouderdom met kanker gediagnoseer: baarmoederkanker en toe die histerektomie, borskanker en toe die dubbele masektomie net om 3 weke later te hoor die kanker is terug. Later maagkanker tot waar sy die afgelope 4 jaar geen meer vaste kos kan eet nie. In 2016 het sy geval en dokters het gesê sy sal nooit weer loop nie, maar sy het opgestaan. In 2018 het die kanker na haar kliere en die res van haar liggaam versprei en verloor sy die gebruik van haar dominante hand.

148 episodes

« Back 13—24 More »